Distrêm

Înanolo,

Çend ro ne bawişk bûne bela li devê min, xwe dikim nêv nivînan îcar jî xewa min nê. Nizam ji westa ketî ser hevdu ye çi ye, canê min giran bûye asas. Hereket heye, heye herikîn lê spor tine, loma ye ez dibêm. De kî serê sibê here Anıt Parkê saetekê bimeşe bireve û paşê were mal serê xwe bişo lo. Ew ne ez im, zanim ne tu yî jî. Dikenim.

Min Bêbaviya Şêxo Fîlîk jî xwendiye Înano, min nivîsa Selîm Temo ya li ser Fuzulî jî. Fuzulî zanibûya piştî çend qirnên din dê ewqas tiştekî muhîm be hebûna çend helbestên wî yên bi kurdî, belkî di bin simbêlan re bibişiriya hinek helbestên din li dîwana xwe zêde bikirana. Nizanim, rast e Selîm Temo serê xwe pir pê re êşandiye û nivîseke bi behrek çavkanî mavkanî nivîsandiye lê wek ku bibêjim Fuzulî bi kurdî nivîsandiye çi ye nenivîsandiye çi ye pir bala min nekişand, çênebû heyecanek bi min re. Bila di sedsala 26an de hinek keç û xortên beşa wêjeya medyaya civakî li ser nivîsên Temo yên Facebook, Instagram, Twitterê bixebitin û bibêjin, ''gelo wî çima him bi kurdî him bi tirkî him îngilizî nivîsandiye.. wê demê çima zimanekî tenê têra şairekî nekiriye'' filan bêvan. Bêyî ku bispêrim belgeyekî, tenê texmîn e a min, di sedsala 16an de meseleyan zimanan ne mîna ku em niha lê dinêrin bû, ne zimanê me ne jî zimanê wî bi xwe ewqas ne xema Fuzulî bû yanî, wisa lê rast hat û nivîsî. Berovajî bifikirim, tew belkî gotibe, were şi'rên Fuzulî te Cizîrî çi hacet, Cizîrî jî li ser wî li dû wî gotibe, wer wer Şîrazî çi hacet, Şirazî jî gotibe Xwedê çi hacet, Xwedê ji xwe ji berê de ji xwe re çi hacet. Kî berî kê hatibû dinê law Înano, kesê kûsan, kîsê bêkesan. Ez çi boş û beredayî dinivsînim wa.

Bi kurdî jî distrê.. 

Ziman miman, kurdbûn murdbûn, di vê jiyana kurt û ''kurmancî'' de em li dû şopa çi ketine Înano bi rastî? Îşev xulqê min teng e dîsa, tu meyne bîra min, ji xwe hat bîra min nameya min a kêfxweşiyê lê keser li ser keseran, keser li ser keseran. Min vekira mejiyê xwe niha û derxista bi hezaran tiştên pûç jê. Paşê biçûma gundekî, li dûrî herkesî û her tiştî.. Ne salek du sal lo, tenê mehek bes bû. Ez ê piştî mehekê bihatama ser hişên xwe. Hiş bim yan huş..

Silav û gulavên êş û elemê naterikînin. 

Omeros